Inter Ward wina oli askem sapot blong Fresh Water

2014 Port Vila Football Association Inter Ward tunamen wina, Fresh Water Ward we bambae hemi travel aot long namba 7 Disemba blong go flyem flag blong Port Vila City long Sister City Cup long Lifou, New Caledonia, bambae oli go long las camp blong olgeta long Mande nekis wik.

Fresh Water Ward we oli kam blong winim fes eva kaen tunamen olsem, bambae oli go long camp long Mande, stret long Fresh Water skul, blong oli spendem abaot wan wik long we bifo oli travel aot long namba 7 blong go long Sister City Cup tunamen ia.

Tim Maneja, Morris Timas, hemi talem se olgeta naoia from bambae olgeta nomo oli lukluk long kolosap everi fee blong full tim i go daon long Lifou, oli stap askem komitmen mo sapot blong full Fresh Water komiuniti, we olgeta nao bambae oli representem taem oli go daon long Lifou.

Timas i stap apil tu i go long Port Vila Municipality, mo olgeta bisnis haus raon long Port Vila, we olgeta bambae oli representem olgeta, blong oli givhan long olgeta long eni samting we bambae i helpem tim long trip blong olgeta long New Caledonia, mo tu long wan wik we bambae oli spendem long camp nekis wik.

“Insaed long Fresh Water Ward tim, i gat plante yangfala we oli no wok, mo help blong wan wan man,o bisnis haus bambae i helpem tim bigwan,” Timas i talem.

Long nara stori blong futbol, Tafea i kam blong winim Narak long 2-0 long Wednesde, mo yestede i lukim Amicale i kam blong winim Shepherds long 2-0.

Long ol maj blong tede, long 11.30am, Spirit i plei Narak, 1pm, Ifira i plei Tafea mo long 3pm, Tupuji i plei Erakor.