Chinese Gavman blong bildim niu fasiliti be ino renovet: Calo

Vanuatu hemi stap wok

had naoia blong putum tugeta ol plan long oda blong mekem sua se kaontri hemi redi long ol fasiliti long taem bifo hemi hostem 2017 Pacific Mini Games.

CEO blong Organising Committee blong 2017 Games, Joe Bomal Carlo, hemi kamaot blong apdet long wanem nao olgeta i stap mekem naoia i go wetem ol fasiliti mo wea ples nao bambae ol gem i tekem ples long hem.

Carlo i talem se Chinese Gavman hemi step in blong no renovetem olgeta ‘existing’ fasiliti be blong oli bildim niu wan.

Hemia i min se Korman Stadium bambae oli mas terem daon, we Calo i talem se bambae i tekem kasem 4 wik blong oli flatem bilding ia, blong givim spes long wan niu bilding we bambae i tekem ples blong olfala stadium we i stap.

Calo i talem se 2 long ol mein samting we naoia oli stap slowem daon ol wok hemi ekonomik mo politikol influens we naoia oli no stebol nating, mo hemi hop se hemia bambae i save wok aot long end blong dei blong mekem se Vanuatu i save hostem Games ia.

Long venue, Calo i mekem i klia se long taem we olgeta i bin winim bid blong Games ia, drim we i bin stap i lukim Santo, meinli Luganville mo Port Vila nao bambae oli hostem Games ia, be follem sam komplikesen we i stap, laekli se bambae i lukim sam futbol maj nomo i stap long Luganville Soccer City mo ol nara wan bambae i tekem ples long Port Vila.

“Bigfala Indoor Sporting Complex we Luganville mo wan Sister City long New Caledonia oli bin stap negosietem, i tekem longtaem tumas blong i luk wan wok i stat long hem,” Calo i talem.

Sapos Indoor Complex ia oli bin wok long hem olsem we i bin stap long plan, laekli se bambae i no futbol nomo, be bambae i gat sam moa disaplin tu oli stap long Luganville.

CEO Calo i talem se Chinese Gavman aid ia bambae i lukim oli bildim wan niufala stadium mo ol niu fasiliti long Korman Stadium site nomo, be long EX FOL, Port Vila Stadium mo Netball Court, bambae olgeta i jas lukluk long ekspens blong hem, be bambae oli renovetem full wan blong oli save akomodetem ol spot Games long hem.

Assistens blong manejem mo ofisietem ol Games, bambae ikam raon nomo long ol nara Pasifik aelan, inkludum Australia mo New Zealand, we bambae oli no fri, be bambae oli kam wetem ekspens blong olgeta.

Be Calo i biliv se Vanuatu i gat taem i stap long saed blong olgeta blong oli save trenem nomo ol lokol talent blong oli handelem eria ia.

Wetem akomodesen blong 2500 kasem 3000 atlet we bambae oli kam patisipet long 2017 Games ia, komiti we i stap i stap traem everi posibol wei blong save akomodetem bigfala namba blong ol atlet ia.

Naoia we i stap olgeta i stap lukluk long ol skul olsem, Lycee o Malapoa blong akomodetem ol atlet ia, be semtaem tu i gat negosiesen i stap gohed blong oli bildim wan Games Village.

Negosiesen i stap gohed naoia wetem Vanuatu National Provident Fund (VNPF) blong pem wan graon samples daon long eria blong Club Hippique, bildim wan kaen olsem wan self contained Games Village, we insaed laekli se bambae i gat sam store, park, we long fiuja bambae i save benefitim ol memba blong VNPF, from ekonomikli bambae hemi kam olsem wan long term investment.

Calo i talem se tim wok bitwin Vanuatu Gavman, Pacific Games Council, Pacific Games Association mo komiuniti raon long Port Vila mo Luganville nao, long end blong dei, bambae oli diteminim weta Games bambae hemi gohed o no.