Vanuatu i dominetem London Test Event wetem 2 win

Tufala representatif blong Vanuatu long London Test Event LinLine Matauatu mo Elwin Miller oli givim wan priviu finis long ol pawa haos blong bij voleibol blong wanem nao oli save ekspektem long Vanuatu long 2012 London Olympic Gems.

Tufala woman ia pruvum long ol pawa haos blong Europe se Vanuatu nomata hemi wan smol kaontri be stil oli save plei bij voleibol long wol stej afta we i lukim oli bin winim Greece long wan sko blong 2 stret sets long 21-13 mo 23-21 mo Netherlands long 21-14 mo 23-21 blong pruvum se oli ol wol klas pleia.
Miller hemi talem afta long win blong tufala ova long Netherlands se hemi no wan mistek we tufala i winim maj ia from tufala i bin traehad blong winim maj ia mo tufala i glad tumas long pefomens we tufala i bin putumaot long taem ia mo hemi wantem talem tankio i go long ol family blong tufala, koj mo ol sponsa we oli stap bihaen long olgeta.

Miller i talem se nekis maj agensem China bambae oli ekspektem wan hae level maj mo oli stap luk fowod long hem finis.

Nekis maj blong tim Vanuatu i stap agensem China we oli ol medolist blong 2008 Olympic Gems long China mo oli rankem olgeta namba 3 long wol.
Vanuatu bambae hemi dipen plante long sapot blong olgeta blong MMUCE Crewe we tim Vanuatu i stap mekem ol trening sesen blong hem long hem mo olgeta nao i bin kam sapotem Vanuatu long tufala fes maj ia.

Win blong Vanuatu ova long Netherlands hemi no festaem we Vanuatu i kam blong winim kaontri afta we i bin lukim long las yia Miller mo stret patna blong hem Henriette Iatika tufala i bin winim long FIVB Wol Tua blong tufala.

London Test Event ia i stap gohed nomo nomata long riot we i stap gohed naoia long England.

Vanuatu i stap plei long Horse Guards long tunamen ia, ples we bambae oli hostem ol bij voleibol maj blong Olympic long hem nekis yia