Vanuatu bij voleibol i mekem wan moa wol klas pefomens
Vanuatu Bij Voleibol we hemi bin go tekem pat long Queensland Open long manis ia oli karem namba 3 ples afta long sam gudfala pefomens blong Elwin Miller mo Henriette Iatika.
Vanuatu hemi serem namba 3 ples wetem tufala pleia blong Australia, Natalie Cook we hemi wan 4 taem Olympic Gold Medalist mo Tara West afta we hemi bin go kasem semi faenol mo lus long 2 sets to 1 agensem wan nara tim blong Australia.
Be ino hemia nomo we Vanuatu i ajivim long tunamen ia, Vanuatu hemi soem se olgeta i ol wol klas atlet taem oli manej blong bitim tim blong Great Britain we hemi follem ol bigfala kaontri olsem Denmark, China mo Estonia we i foldaon agensem yumi we fulap long olgeta oli no save wea ples ia nao Vanuatu i stap long hem.
Queensland Open ia hemi kam olsem wan warm up nomo blong Vanuatu bifo hemi statem 18 manis Olympic kwalifikesen rod blong 2012 London Olympic Gems.
Long rod blong hem ia Vanuatu bambae hemi mas plei at least 12 aot long 17 FIVB World Tour tunamen blong hemi save kwalifae long merit blong tek pat long 2012 Olympics be ino olsem oltaem we yumi stap go tek pat long ol Olympic Gems long invitesen nomo.
Henriette mo Elwin tufala i kasem kaontri finis long Tuesdei wik ia mo naoia oli stap pripea blong go tekem pat long fes FIVB World Tour Olympic Kwalifikesen Tunamen long Brazil hemia long namba 18 kasem 23 April.
Long Wol Ranking naoia, las yia Vanuatu oli bin rankem hem long namba 232 posisen be afta we yumi bin go tekem pat long 6 aot long 16 FIVB tunamen las yia ranking blong yumi i bin jenis bigwan mo naoia yumi stap long 142.
Las yia tu hemi wan top yia blong Bij Voleibol afta long ol bigfala win agensem ol bigfala nem blong Bij Volei long wol yumi kasem eye blong IMG we hemi wan intanasonal media oganaesesen we hemi bin filmim tim blong Vanuatu olsem ol haelaet blong 2010 mo naoia oli stap soem film ia long 161 kaontri wetem help blong 25 intanasonal broadcasta we i lukim ova 434 milien man oli stap wajem.
Print
E-Mail
