Thursday August 28, 2014 - 5:55 am | Login

Tafea mo Seveners i endem sekon maj long dro

Futbol

Sekon maj blong Tafea mo Seveners long 2012/2013 sisen blong TVL premia lik i no go olsem we tufala tim ia i stap ekseptem, afta we i lukim tugeta i kitkit long 0-0.

Seveners we oli bin openem sisen ia wetem wan bigfala lus blong 5-0 agensem Spirit 08, oli jenisim gem plan blong olgeta mo oli putum hed tugeta blong hollem taet Tafea go kasem faenol whistle nomata we olgeta i bin dominetem sam pat blong gem mo, be oli no save sko.

Tafea we oli ol Opening Knockout jampion, oli no save prodiusum kaen futbol ia we risal blong hem ia nao oli fes tim long sisen ia blong winim wan ‘silver ware’, i mekem se long plante pat blong maj ia oli mas fosem ol difenda blong ol blong stepemap gem blong olgeta afta we Seveners ofens i bin givim had taem long olgeta.

Ol top janis blong poen i kamaot long sekon haf long tugeta tim, afta we i lukim Spencer Noal hemi no manej blong tapem in wan pass insaed long gol maot afta we Reece Lerr hemi bin passem ded poen ia i kam long leg blong Noal we hemi shud tajem bol nomo blong sko. Long saed blong Tafea, straeka, Alista Kalip hemi bin brekem thru difens blong Seveners mo tream jipim bol ova long Seveners kipa, Peter, be i lukim rafri i singaot wan faol afta we Kalip hemi bin pushum daon Peter.

Risal blong maj ia i mekem se tugeta tim i lusum wan mo kitkit long wan.

Long ol nara maj long wiken ia, long 11am, ol lida blong tebol afta long dei 1, Spirit 08 i plei Ifira, long 1pm, Amicale i plei Tupuji mo long 3pm, Erakor i plei Shepherds United.

Maj blong Amicale mo Tupuji bambae hemi wan ripit blong kwota faenol we i lukim Tupuji i bin aotem ol Vanuatu Jampion long Opening Knockout.
Maj ia bambae i luk Amicale i wantem baons bak follem lus blong olgeta agensem Shepherds United long las wiken.