Friday April 18, 2014 - 7:35 pm | Login

Rural Bisnis Sakses – Go Long Maket!

Rural Development

Without a sale there is nobusiness.  Selling is often the most difficult part of a business, but there are some things you can do to make selling easier.

Sipos yu no gat sels, bae yu no gat bisnis.  Blong salem wan samting emi hadwok, be i gat sam samting we yu save mekem blong mekem se sels emi isi lelbet.

Tingbaot.  Taem yu go long stoa blong pem wan samting, wanem nao tingting blong yu?  Mi nidem samting ia?  Sipos mi pem samting ia, bae mimi hapi?  Praes emi stret o emi hae tumas?  Taem yu askem ol kwestin ia, yu stap lukluk se emi gud blong pem, o bae yu lifem i stap fastaem.  So, sipos man i wantem salem wan samting, emi mas askem ol kwestin ia fastaem – prodak emi givem valu long kastama?

Prodak
Wanem nao prodak we bae yu salem, emi olsem wanem?  Eksampol, sipos yu wantem fidem faol mo salem.  Bae yu salem faol we emi yang faol, o emi bigwan finis?  Yu salem emi laef o yu kilim ded mo salem?  Yu salem olsem nomo o yu karemaot gras blong em?  O yu kukum finis mo salem?  Yu salem lek blong faol nomo o fulwan?  Yu salem ek?  Bifo yu save gohed blong salem wan samting yu mas jusum gud wanem nao stret prodak blong yu.

Maket
Prodak mo kastama tufala i joen tru long valu blong prodak.  Tingbaot wanem nao valu blong prodak blong yu.  Yumi go bak long bisnis blong fidem faol.  Yu save salem ek, yang faol, faol i bigwan finis, faol we yu kilim mo klinim finis, o faol we yu kukum finis.  Wiswan?  Lukluk long valu.  Tingbaot ol kastama blong yu, oli wantem wanem?  

Long rural komuniti evri famle i gat faol.  Yumi laekem kakae faol mo ek.  Sipos yumi wantem kakae faol, bae yumi stonem wan, kilim mo kakae.  Be long saed blong ek?  Hadwok blong faenem from we ol faol oli mekem ek long bus mo oli haed gud.  Mo dog tu oli kakae ek blong faol taem oli faenem long bus.  Yumi laekem kakae ek, be yumi sot long ek.  Olsem wanem sipos yu bildem wan haos blong faol i go mekem ek, mo yu salem ek long ol man long vilij?  Man i save pem from oli glad long ek - ek i givem valu long olgeta.  Olsem wanem sipos yu kukum ek mo salem?  Valu blong ek we yu kukum finis i go antap from man i no wari blong laetem faea.

OK, so yu bin faenem wan samting we yu save salem.  Nao lukluk gud long saed blong hu i pem.  Hu nao emi stret kastama blong yu?  Emi stap we?  Emi tru se wanwan man i save kam long haos blong pem ek.  Be long taem blong lafet, o maj blong futbol, ol man i hip mo bae oli hangri blong kakae ek blong yu.  Olsem wanem long ol narafala vilij we oli stap klosap long yu, yu save wokbaot blong salem ek long olgeta?  Sipos i gat wan big vilij klosap long yu we wan bigfala stoa i stap?  Bae oli save pem ek blong yu blong salem bakegen long wanwan man?

Praes
Sipos wan man i wantem pem wan samting, bae praes i stap hefi long tingting blong em.  Yu mas waes blong putum wan gud praes long prodak blong yu.  Sipos praes emi daon bae yu no win gud long wok blong yu.  Sipos praes emi hae tumas bae man i no save pem, mo yu lusum wok blong yu.  Gud praes emi stret long valu.  

Be lukluk gud from valu emi save jenis.  Taem man i stap long haos, garen i klosap mo man i no wantem pem wan kakae.  Be taem man i go luk wan futbol maj longwe, garen i no stap klosap mo emi redi blong pem wan kakae.  Valu emi save jenis.  Taem valu i go antap emi isi blong salem.

Kompetisan
Kompetesen emi bisnis we oli salem wan prodak we emi semak long prodak blong yu.  Man i jusum blong yu, o emi jusum blong narafala.  Emi depen long valu.  Sipos yu salem bred long vilij, mo wan narafala woman i salem bred tu.  Bae man i pem wiswan?  Bae oli lukluk bred – emi swit, emi sofsof, emi bigwan?  Olsem wanem long praes – praes blong yu emi antap long narawan?  Kompetesen emi wan kaen rao.  Bisnis i rao long kastama mo oli yusum valu blong win.  Hu i save givem big valu long kastama, emi win.

Long kalja blong yumi, yumi no laekem rao.  Mi luk se samfala oli no wantem mekem bisnis long vilij from oli no wantem statem rao blong kompetesen.  Mi luk se long vilij we oli gohed long divelopmen, oli miting blong tokbaot vilij bisnis mo oli kam long wan agrimen.  Eksampol, mi luk se long samfala vilij we oli bigwan lelbet i gat ol woman oli mekem maket.  Sipos evri woman i go long maket evri dei bae oli westem taem from oli salem smol nomo.  Oli miting mo oli agri se wan woman emi kam long dei blong em nomo.  Taem oli seraotem wok olsem, oli salem planti mo oli no westem taem.  Bisnis long vilij i save karem gud valu i kam long ol man, woman mo pikinini.  Yumi mas faenem rod blong rao i finis mo yumi sapotem divelopmen blong vilij bisnis.            

Taem mi stap mekem sop long Not Efate long 1989, mi bin wantem salem sop raon long ol vilij.  Ale, mi wetem wan wokman blong mi, nem blong em Kit blong Emau, mitufala i karem wan smol trak mo pas raon long evri vilij.  Taem mitufala i kam long wan vilij, Kit emi stanap long bihaen long trak mo emi singaot strong se, “Sop!  Sop!”.  Taem ol man i harem, oli kam blong lukluk.  Kit emi soem sop long olgeta, mo mitufala i talemaot se sop emi wan strong sop, emi save klin gud, saes i big wan, mo praes emi daon long Sinua sop.  Wanwan woman oli pem blong testem.  Evri vilij i semak.  Wan wik i pas, mo mi witim Kit, mitufala i pas bakegen long ol vilij.  Be taem Kit i singaot, fulap mama i kam long trak mo evri wan i pem sop.  Go go sop blong mitufala i finis kwiktaem.  

Blong promotem prodak blong yu, yu mas talemaot ol valu blong em long ol man.  Sipos yu haed nomo, bae yu no save salem wan samting.  Maet yu no nid blong go long rod, olsem we Kit mo mi bin mekem, be yu mas faenem wan gud rod blong promotem prodak blong yu.   

Divelopmen Blong Sels
Wan stori.  I bin gat wan woman long wan smol vilij, farawe long wan smol aelan.  Woman ia emi stap wokem sop long kokonat oel.  Emi wokem blong em nomo mo emi yusum blong wasem klos.  

Ol narafala woman long vilij oli talem long em se, sista, sop blong yu i gud wan bitim Sinua sop.  Sipos yu mekem blong mifala, bae mifala i glad blong pem blong yu.  Ale, woman ia emi pem sam smol tul mo emi mekem sop blong olgeta.  Woman ia emi faenem se wok i bigwan lelbet, so emi askem wan sista blong em blong halpem em blong wokem sop – mo taem emi miksim wan sop, emi pem sista blong em 300 vatu.  Sista i glad long vatu mo ol woman long vilij oli glad long sop.

I no longtaem wan smol mama blong woman ia we emi stap narasaed long aelan emi kam luk em mo emi talem se ol woman long narasead oli askem sop blong em from oli taet blong lusum vatu long Sinua sop.  Ale, woman emi stat blong mekem sop blong olgeta long narasaed.  Emi askem tu woman blong vilij blong halpem em blong wokem sop wetem em mo sista blong em – mo emi pem tufala 300 vatu long wan miks sop.

Bambae i gat wan mared long aelan, mo wan woman i kam long taon blong stap long mared.  Woman ia emi luk sop, mo emi askem ol woman long vilij se sop ia emi kam we?  Ol woman i talem se wan woman blong ples ia nomo emi mekem.  Woman ia emi go luk woman blong sop mo emi agri blong salem sop long wan smol stoa blong em long taon.  Bambae, from we sop emi gud kwaliti mo praes emi daon, evri man long taon i pem sop kokonas.  Go go, woman blong sop emi pem samfala masin blong mekem sop mo emi karem 20 woman blong wok insaed long smol faktri blong em.

Bambae i gat wan turis i kam long taon, mo emi luk sop kokonas long evri stoa long taon.  Emi ting se sop ia emi save salem long Ostrelia.  Emi jam long smol plen mo emi go long smol aelan blong go luk woman blong sop.

Nekis Mandei:  OK, yu save prodak blong yu be hao nao blong mekem redi evri samting blong bisnis blong yu?  Yu nidim wan masin?  O yu nidim wan faktri haos?  Yu nidim ol wokman?  Ol sapli blong yu bae i kam we?  Yu mas pem laesens?  Long nekis wik bae yumi tokbaot hao blong mekem redi evri samting long bisnis blong yu.  

Sipos yu gat eni kwestin o tingting long saed blong divelopmen, sendem email i kam long Daily Post long news@dailypost.vu.