Tuesday July 29, 2014 - 5:26 am | Login

Re: Lands Minister could be in breach of Land Leases Act

Dear Editor,

Mi refea long heding antap we i kam aot lo Daily Post News Paper Issue namba 3872 lo Saturday, 1 June, 2013.

Mi wantem givim smol mo personal tingting blo mi nomo lo mata ya. Sapos tingting blo mi i stret, i gud, mbe sapos ino stret bae yufala korektem mi.
Mi stap kwestenem se from wanem nao wan civil seven we hemi wok lo Lands Dipatmen we Gavman blo Vanuatu hemi employem hem mo i givim wok lo hem, i save stap tok akensem boss blo hem bakagen lo pablik. “Something is just not right”.

Ofisa ya hemi shud sarenda nomo mo letem minista hemi mekem wok we Kaonsel blo ol Minista hemi givim long hem blo mekem, we i blo mekem investikeisen lo ol “Alleged Corruption” [tingting sei kat kruket wok] insaid lo Lands Dipatmen.

Kaonsel blo ol Minista hemi givim instraksen finis blo Minista blo Lands mo Ofes blo Ambadsman tufala i mekem investikeisens from se ol investikeisens ya oli shud bin gohed finis be i gat andastanding se ofis blo DG blo Lands (we i stap lo saspensen nao ia folem ol risens ya) mo Lands Dipatmen oli been stap blokem.

Hemia nao emi risen wae Kaonsel blo ol Minista hemi mekem instraksen olsem. Hemia hemi instraksen blo gavman. Yu Lands Ofisa konsern, yu satp kwaet, kasem ol investikeisens ya oli finis fastaem.

Ol seksens blo Land Leases Act (Loa blong Kraon) blo Vanuatu we sos lo stori emi been stap mensenem mo meibi i kat ol nara wan bakagen, lo tingting blo mi se oli stap rifea lo “person” (wan man o wan woman) we hemi kat wan tingting we i no stret o wan “wrong motive” (plan blo mekem wan rabis fasin). Hemi wan personal or private plan o tingting blong wan person nomo we hemi kat blo mekem ol rabis samting lo ol dokiumens blo ol lands insaed lo Dipatmen blo Lands mo Land Records Office.

However, Minista blo Lands hemi no act folem self-interest blong hem be lo interest blo nation.

I klia nomo se wan sos we i been putum nius ya lo Daily Post, hemi stap traem nomo blo haedem “alleged” rong aksen blo samfala ofisas blo Lands lo ol difren seksens lo “Land Leases Act” (Loa blo Kraon). Hemi save talem hamas, hamas, be pablik mo Gavman i save se i gat samfal allegations blo corruption (Fasin nokut) insaed lo Lands Dipatmen. Minista Ralph hemi stap karem aot nomo instraksen we Kaonsel blo ol minista i givim long hem mo Ofes blo Ambadsman blo investikeitem ol alleged corruption lo Lands Dipatment. Hemi stap mekem lo level blo Gavman blo Repaplik blo Vanuatu be ino lo personal interest blong hem nomo.

Maybe, i gud blo Gavman blo tedei i jenisim samfala seksens blo Land Leases Act. (Loa blo graon) blo Vanuatu, sapos no bae oli kontiniu blo mekem samfala dils we ino stret lo wok blo graon. Mi talem tingting ya from se hemi very klia se meibe i gat samfala ofisa blo Lands oli stap mekem ol kruket dils lo graon mo oli stap haed bihaen lo loa ya.

I gud se yumi weit blo luk risalt blo investikeisens we oli stap gohed blo lukim se ol “allegations” ya oli tru o nokat.

Emil Mael