Lik ino akseptem ol non laesens blong tekem pat long kompetisen

Port Vila Petank Lik i rejisterem finis 3 klab we oli save tekem pat long program blong hem long yia ia.

Long olgeta ia i gat Unelco PC, Tagabe PC mo Tennis PC.

President blong Lik, Jerry Moli i talem se afta long fulap kol i go long ol petank pleia blong rejisterem klab blong olgeta, lik i manej blong kasem ofisol rejistresen blong 3 klab nomo.

Moli we semtaem hemi interim President blong Vanuatu Petank Federesen i talemaot long Daily Spot se trifala klab ia i save gohed wetem ol program blong petank sisen blong 2011 – 2012.

Fes kompetisen blong lik bambae i gohed long nekis wik hemia long Mandei namba 25 Julae. Mo hemi knokaot tunamen blong Independens Selebresen.
Moli i talem se Independens selebresen kompetisen ia ino open long ol klab we oli no rejista mo i no blong ol non laesens pleia.

Lik i klosem finis rejistresen mo trifala klab ia nomo i gat raet blong kompit long ol tunamen blong lik long sisen ia be hemi no save akseptem eni klab we ino komplae long ol rul blong rejistresen.

Hemia i minim tu se ol pleia blong trifala klab ia nomo i gat raet blong pat blong Nasonal Skwad blong go daon long Nasonal Gems mo Pasifik Gems long Niu Caledonia mo long ol intanasonal tunamen. Wan long olgeta intanasonal tunamen ia bambae i gohed long nekis yia long Franis mo Vanuatu i gat janis naoia blong tekem pat long bigfala ivent ia.

Plante taem ol intanasonal tunamen i stap gohed be Vanuatu ino gat ol kwalifae pipol blong hem blong go long tunamen ia. Be naoia we Port Vila lik i rejisterem nomo 3 klab yumi save tingting se i gat sam skillfull petank pleia bambae i misaot long ol program blong sisen ia mo tu bambae oli misaot long Nasonal Gems mo Pasifik Gems blong yia ia.

Daily Spot i witnesem se long evri dei fulap pipol we i lavem petank oli stap oltaem long petank fil long Sea Front blong kompit. Be bigfala sapraes se from wanem nao oli save rejista long lik.

Niu Caledonia i rigadem Vanuatu naoia olsem wan kaontri we petank i kam popiula long hem mo hemi prodiusum fulap top pleia mo hemi stap enkaraejem oltaem Vanuatu blong leftamap mo promotem disaplin ia truaot long kaontri.