LFA i konfemem offisol dro blong Brisk tunamen

Ofisol dro blong Vanuatu Futbol Assosiesen Brisk Kap tunamen we bambae Luganville hemi hostem hemi tekem ples las Fraedei stret long ofis blong MV Brisk long Luganville.
I gat tu pul everiwan, pul (A) mo pul (B) mo insaed i gat 4 tim long wan pul.
Long pul (A) i gat Luganville, Tafea, Penama mo Torba. Insaed long pul B i gat Port Vila (Academy), Sanma Warriors, Malampa mo Sanma Hornets.
Academy bambae hemi representem Port Vila nomo mo tingting blong usum olgeta hemi blong preprem olgeta from Unda 17 wol Kap kwalifaeing raon. Sanma bambae hemi kam wetem tu tim. Wan tim bambae hemi fom aot long Fanafo mo Tutuba Lik mo nara tim bambae hemi kamaot long Malo mo Saot Santo Lik.

Tunamen ia hemi wan open tunamen we i minim se ol provins oli save tekem eni best pleia blong olgeta long ol diffren asosiesen espeseli long Luganville mo Port Vila blong save representem provins blong olgeta. Tunamen ia bambae hemi tuff from i shud lukim ol best pleia blong ol diferen assosiesen oli kam wan ples blong save kompit long wan hae profael kompetisen.

Long taem ia tu bambae i gat lonjing blong Academy program long Noten provins mo lonjing blong premia lik blong Not. Tunamen bambae hemi stat stret long namba 21 long manis ia.
LFA i wantem mekem i klia long ol provins se everi seleksen i shud arraev long Luganville bifo namba 17 July we hemi bifo lonjing.