Injuri hemi wan konsen blong ol pri skwad pleia

Rody Lenga we hemi stap insaed long pri skwad oli mas karem hem i kamaot nomo long fill as wiken afta long wan faol we i kam long Tafea pleia Robert Thompson we hem tu hemi wan pri skwad pleia

Vanuatu Futbol Federesen (VFF) sapos hemi no lukluk gud afta long ol pleia blong pri skwad bambae oli save mestem aot sam long ol potensol pleia blong yumi long Oceania Nations Kap long Solomon Aelans.

Afta long fes leg blong Nasonal Supa Lik(NSL) we majority blong ol pri skwad pleia oli stap plei insaed long hem, i stap kam moa klia se follem longfala 2011/2012 sisen mo O Lik, ol pleia oli nidim spell afta we i lukim namba blong ol injuri blong ol pri skwad pleia i stap go antap.
Nasonal straeka, Fenedy Masauvakalo, mo kipa, Selionie Iaruel, oli kasem ol injuri long leg we i lukim long trening blong pri skwad yestede long moning oli no bin tenap afta oli gat ‘swelling’ mo ‘discomfort’ long leg blong ol follem ol injuri we oli kasem i stap.
Daily Spot i bin lukim Rody Lenga mo Selwyn Sese oli bin tritim olgeta tu long maj long Sarere agensem Tafea be ripot we i kasem Daily Spot se yestede oli bin pat blong trening.

Pri skwad koj, Kaison Maki, i talem se kaen maj bitwin Tafea mo Amicale las wiken ino helpem nating futbol long Vanuatu naoia we yumi stap traem blong priperem wan tim from wan bigfala tunamen olsem, from hemi isi nomo blong ol pleia oli kasem ol injuri.
George Regenvanu we hemi hed blong Just Play program long kaontri we hemi gat bakgraon long ‘physiotherapy’ hemi talem se kondisen we ol pleia blong pri skwad oli stap go thru long hem naoia long NSL hemi bitim limit we wan pleia i save kasem mo naoia VFF Teknikol Advaesa, Christian Chosson, i stap traem faenemaot hao nao blong dil wetem hemia naoia we taem i no stap long saed blong VFF.