Ifira kapten Chichirua i transfe i go long Tafea FC

Ifira bambae i lusum ol seves blong kapten Andrew Chichirua (end long raet) long sekon leg

Bigfala difenda mo kapten blong Ifira Blak Bed FC Andrew Chichirua bae long nekis Port Vila Futbol Asosiesen haf sisen blong 2010/11 bae hem I ple blong olgeta we oli stap kam nambatu long PFVA klasmen, Tafea FC.

Sekreteri blong PVFA, Mr Bong Shem, hem I talem long Daily Sports afta we transfe windo I bin klos long las Sarere namba 15 Disemba.

Be maet Ifira Blak Bed wetem Tafea FC oli kam long wan andastanding se sapos Tafea FC i karem Chichirua bae hem I mas rilisim Achilles Tarise, we long las sisen hem I joenem Tafea FC, be fulap futbol fan long Port Vila oli save hem olsem kapten blong Spirit 08 taem Spirit I stap iet long Fes Divisen.

Mr Shem i talem se hemia nao sam long olgeta bigfala nem we oli muv long Premia Klab oli go long narawan mo hem I konfemem tu se I gat wan rikwes blong foma kapten blong Vanuatu mo kapten blong Spirit 08 Seimata Chillia blong go joenem top klab blong Vanuatu tede, Amicale FC.

“Be toktok abaot transfe ia hem I fasfas iet,” Mr Shem I talem.

Foma nasonal rep Roger Waiwai we long las sisen hem I bin ple blong Amicale FC be spenem moa taem long bens bitim insaed long fil hem tu long Sarere nekis wik taem ol PVFA I statem namba tu leg blong 2010/11 sisen bae hem I ple wetem Fes Divisen top side Narak FC.

Narak FC bae I karem sevis blong foma Amical FC pleya Peter John afta we hem I tu I stretem ol pepa blong hem blong transfe, Mr Shem I talem.

Ol nara transfe we PVFA I konfemem I gat; foma straeka blong Yatel FC, Sam Musa bae I transfe I go long Ifira, Henry Stalolo mo Alex Yavelu blong Ifira oli muv I go long Spirit 08 FC, foma Westtan straeka mo Amicale FC pleya Tony Iauko hem I muv I go joenem USIB Futsal Tim.

Transfe windo bae hem I open bakegen long medel blong yia ia bifo 2011/12 sisen I stat.