Dual sitizensip

Dear Editor,

Tank yu long yufala blong putum long taem blong Independens, wan interesting pepa long saet long dabol sitizensip. Afta 32 ia blong Independans, em i taem blong stretem sam injastis. Dabol sitizensip ia em i no blong evri sitizen, em i fes wan blong olgeta we ol i mared wetem wan we em i wan sitizen blong narafala kantri mo ol pikinini blong olgeta. Long kastom blong Vanuatu, ol pikinini ol i fri blong ko visitim ol Boubou blong narafala ailand. Be taem papa o mama blong yu em i blong wan narafala ples, yu no fri blong ko luk ol Boubou, yu mas kat wan visa we samtaem em i sas. Tu sam Papa/ Mama ol i mas samtaem leko ol raet mo ol samting blong olgeta long ples blong olgeta blong folo hasban/waef long Vanuatu. Samtaem tu, ol pikinini o Papa/Mama ol i mas ko stap 3/6 manis long ples blong no lusum evri ting blong olgeta. No foget, plante ol i blong ol Pacific ailand nomo…Emia i no stret mo i no respectem raet blong ol pikinini we yumi stap tokbaot bikwan…

Sapos pikinini i no fainem wok long Vanuatu mo i mas ko wok long ples blong Papa/ Mama, mo i stap long taem, bae em i save lusum sitizensip blong Vanuatu, ples we em i bon long em, mo kat nasara blong em. Mo sapos em i kam bak blong Vanuatu, nao em I wan ovasi man/woman mo i nomo save wok from em i force blong leko sitizensip blong em folo Konstitusen blong Vanuatu.

Long taem blong Independens, i tru se yumi hapi tumas blong yu mi stap blong exist we bifo yumi nating mo yumi save talem se i stret blong yumi strong long wan sitizensip. Rimenba olgeta blong ol Pacific ailand, plante ol women, we long taem ia ol i mas jus mo sam ol i mas leko Vanuatu, even ol i kat ol pikinini long ples ia… Be afta 32 ia we sam ol i fesem injustis mo ol i safa from ol i lovem wan man/woman Vanuatu, yumi mas tinting hevi blong mekem ol change we ol i folo kastom blong yumi we yumi stap talem oltaem be sori, yumi no stap tingting hevi blong mekem tru.
Yumi mas soem se i tru yumi kasem 32 ia!
Sitizen we i kat konsern