Asia Pacific Beach Soccer tunamen blong kam wan annual event

Lukluk i stap se Asia Pacific Beach Soccer Gold Cup we i bin tekem ples long Australia bambae hemi save kam olsem wan annual event.
Toktok ia i kamaot Oceania Futbol Confederesen (OFC) Sekretri Generol Tai Nicholas long end blong tunamen ia long Sande namba 8 Eprel.
Nicholas we hem wetem president blong OFC, David Chung, tufala i bin go witnessim faenol bitwin Solomon mo Vanuatu, hemi talem se tunamen hemi save kam moa bigwan long fiuja mo naoia we i stap i gat 8 intanasonal tim oli konfem finis blong tekem pat nekis yia.

Nicholas hemi talem se OFC hemi redi blong sapotem event ia be priority blong OFC nekis yia hemi stap long Januari 2013 Wol Kap Kwalifaea long Tahiti mo ol nara event olsem FIFA Wol Jampionship.

Long nara nius blong bij soka, Teknikol Advaesa blong Vanuatu Futbol Federesen, Christian Chosson, we hemi wan foma ‘scout’ blong Olympic de Marseille, hemi congratuletem tim from impoten win ia mo hemi stap komendem Tim Maneja, Harry Atisson, ol koj, Wilson August mo Robert Yelou mo VFF wetem ol sponsa long hadwok we oli mekem we frut blong hem nao i lukim Vanuatu hemi kam niu Asia Pacific Beach Soccer Gold Cup jampion.