2 intanasonal maj blong openem Stade
Afta long longfala spell blong krismas mo niu yia ol fan blong futbol bambae oli no wet longtaem nating blong luk Port Vila Municipal Stadium i kambak laef bageken.
Port Vila stadium bambae i kambak laef bageken wetem ol intanasonal maj, intanasonal maj ia ino min se O-LiK be bambae i lukim wan jampion klab blong Lifou, UJ Wejemen bambae i kam daon wetem nasonal skwad blong New Caledonia blong mekem sam maj agensem Tafea mo Amicale FC.
Pablik bambae i save witnessim long namba 22 long manis ia we hemi wan Sarere, long 1pm Tafea FC bambae hemi pleiem jampion klab blong Lifou, UJ Wejemen mo long 3pm Amicale FC bambae hemi pleiem nasonal skwad blong New Caledonia.
Long following Mande 24 January, pablik bambae i save witnessim wan taste blong Melanesian Kap mo apkaming Saot Pasifik Gems taem we nasonal skwad i pleiem New Caledonia long 4pm.
Hemia bambae hemi festaem bageken afta long 3 yia we Vanuatu ino lukim nasonal skwad i plei long home graon.
Long Tuesdei 25 January, Amicale bambae hemi pleiem UJ Wejem long 4pm.
Ofisol arenjmen blong kaming blong nasonal skwad blong New Caledonia, Daily Spot i andastan se Manejmen blong Amicale nao hemi inisietem kaming blong olgeta i kam long kaontri mo long saed UJ Wejemen we hemi shud kam daon long kaontri finis long end blong las yia be i lukim oli gat problem wetem ol pepa blong olgeta, Port Vila Municipality nao hemi arenjem blong oli kam daon thru long sista city agrimen we Port Vila i gat wan municipality blong Lifou.
Ol gem ia bambae i kam olsem ol curtain raiser mo semtaem preperesen maj redi sekon leg blong PVFA jampionship we bambae hemi kik off long following Sarere blong ol maj ia we hemi namba 29 January mo tu preperesen blong Amicale from O-Lik maj blong hem wetem ol OFC Jampion Hekari United long nekis manis.
Print
E-Mail
