DailyPost Administrator posted on March 08, 2010 18:56
 |
| Marist FC |
Marist FC hemi rikodem fes poen blong hem daon long O-Lik grup B taem we hemi hollem taet Tafea blong tufala i kitkit long wan sko blong 0-0.
Marist we i lukim oli kam wetem ol yangfala pleia nomo oli bin dominatem fes haf blong maj mo i lukim oli bin mestem sam janis blong sko.
Tafea tu long ol fes minit blong fes haf i lukim Jean Nako hemi mestem gud wan janis long fored blong gol blong Marist blong putum nem blong hem long sko sheet.
Fes haf i finis mo i lukim tufala tim ino manej blong kapitalaes long ol janis we oli gat mo i lukim sko i stap long 0-0.
Long sekon haf i lukim Sike, kipa blong Tafea FC, hemi manej blong blokem wan penalti we straeka blong Marist hemi traem blong putum i go antap long left hand saed blong gol be i lukim Sike hemi manej blong pushum aot bol ia.
Gem hemi gohed bageken mo i lukim tufala tim oli mestem sam moa janis blong putum poen mo hemia i kontiniu kasem faenol whistle.
“Tafea sapos hemi bin stap mek use long ol janis we i gat ating bambae yumi save luk 6 o 7-0 tede,” wan fan blong Tafea i talem.
Kapten blong Tafea hemi talem long Vanuafoot se hemi no glad nating long risal blong Sarere agensem Marist mo hemi talem se ol boe oli shud skorem ol poen be i lukim oli no bin save mekem mo from hemia hemi wantem apolojaes i go long ol fan blong Tafea we oli bin kam blong sapotem olgeta long dei ia.
Long narasaed, kapten blong Marist Abraham Iniga hemi talem long Daily Spot se olgeta oli glad long risal ino from se oli gat wan poen long klasmen be from gem we oli plei em long Sarere hemi best gem blong olgeta so far long tunamen ia.
Kitkit blong Tafea i livim hem wetem 8 poen mo bambae oli wet nomo long gem blong Lautoka mo Hekari blong bambae oli save stret wea posisen tim i stap long hem naoia.
Nekis mo las gem blong Tafea bambae is tap wetem Lautoka long Port Vila Municipal Stadium long 28 long manis ia.
Marist bambae i plei las maj blong hem wetem Hekari.
- Raymond Nasse