DailyPost Administrator posted on February 06, 2010 11:14
Afta long Ken’s Memorial Kap we hemi kam olsem wan preview blong wanem nao ol man bambae oli ekspektem blong lukim long sekon raon blong 2009/2010 jampionship, bambae ol maj oli stat tede bageken.
PVFA sekon raon blong ol jampionship bambae hemi stat tede bageken, hemia blong olgeta long sekon, fes mo premia divisen.
Fualp long ol man oli bin stap wet blong wajem ol maj blong premia follem nomo transfea blong ol pleia blong Solomon Aelans mo Fiji we Spirit 08 mo Amical oli kam blong joenem tim blong olgeta.
Amical we bambae hemi traem blong defendem ples blong hem olsem lida blong premia agensem Tafea tede oli gat tufala samting we bambae oli save usum blong mentenem posisen ia, wan hemi veteran straeka blong Solomon Aelans Batram Suri mo ol nara 4 man ples blong hem mo niu unifom we Nike Australia hemi sponsarem wetem ol niu shoes we ol pleia oli save usum tede.
Tafea tu bambae hemi karem wan pleia blong Solomon, Frazer Maebule blong kam joenem klab.
Wan nara tim we fulap man bambae oli interes blong wajem hemi Academy we afta long tour blong olgeta long New Caledonia we oli bin winim jampion klab blong we we hemi AS Magenta long 5-4 oli kam blong pruvum olgeta bageken taem we oli winim Amical long wan sko blong 3-1 mo Tupuji 2-0 long Ken’s Memorial Kap pool gem we i lukim olgeta i karem namba 4 ples.
Tede bambae hemi sekon dei blong sekon raon blong 2009/2010 jampionship from i bin lukim Tupuji hemi bin plei finis wetem Seveners we i lukim Tupuji I bin winim gem ia long 3-2.
Long sekon divisen i lukim Cultures Utd FC hemi stap lid wetem 13 poen, follem wetem Narak Tegapu FC wetem 12 poen mo AS Ambassadoe wete, 10 poen.
Long fes divisen Shepherds Utd naop hemi stap lidim tebol wetem 14 poen, follem wetem Ifira Blackbirds wetem 13 poen mo Erakor GS long namba tri ples wetem 10 poen.
Long premia, Amical nao hemi stap lidim tebol wetem 21 poenm follem wetem Tafea wetem 20 poen mo Spirit 08 hemi gat 18 poen mo hemi kam namba tri.
- Raymond Nasse