DailyPost Administrator posted on February 06, 2010 11:09
 |
| Frazer Maebule |
Top midfil straeka blong Uncle’s FC blong Solomon Islands Frazer Maebule oli awodem hem olsem Pleya blong Tunamen long wan kompetisen long Solomon long las yia bae hem i sud apia blong Tafea FC tede agensem Amical FC we i gat 5 wantok blong hem tu oli ple long hem.
Be wanem we Daily Sports I harem se Maebule, we profesenol wok blong hem I wan polisman, hem I kam joenem ol jampion klab blong Vanuatu peposli blong helpem olgeta from kampen blong olgeta long nekis tri gem blong O-Lik.
Hem I talem long media se hem I kam long Vanuatu blong helpem Tafea FC from tri las gem blong olgeta long O-Lik. Tafea FC naoia I stap lidim Hekari FC, Lautokoa FC, Marist FC long grup B.
Be nomata long hemia oli ekspektem hem long Vanuatu blong ple wetem Tafea FC blong traem winim kualifikesen tu blong nekis O-Lik representesen afta long Super 5 Series long yia.
Mo i no Tafea FC nomo wetem Amical FC mo Spirit O8 oli tingting hevi long pefomens blong olgeta long yia ia from Daily Sports I faenemaot long wan ripot we Presiden blong Port Vila Futbol Asosiesen I sendem I go long media I soem se evri top klab blong Premia Divisen oli karem ol niu pleia.
Be wan muv we I kasem fulap ae blong ol komenteta blong futbol nao hem i fulap klab naoia oli karem ol pleya blong futsal I go strongem tim blong olgeta long aotdoa.
Seveners Utd hem I karem wan futsal pleya blong Freedom Futsasl Klab, Tafea FC hem I karem tri futsal pleya, Teouma Academi I karem wan, Tupuji Imere FC I karem 5 pleya blong Tupuji Majik Futsal Klab, mo Yatel FC hem I karem wan long N03 AVECK Futsal Klab.
Westtan Broncos hem i no karem wan pleia blong futsal be hem I karem 4 niu pleya long ol klab blong PVFA be lusum yang midfilda blong olgeta blong Paama Silas Tungon long Yatel FC. Yatel FC tu hem I karem straeka blong Vaum United long Luganville Futbol Asosiesen, Kelly Oli.
Wetem ol niu divelopmen ia I gat posibiliti se bae kompetisen blong Premia, Fes Divisen, mo seken divisen I taf we I taf long nara haf blong TVL2009/10.
- Ricky Binihi