Stat long 1994 kam kasem 2010 i nogat wan klab blong Vanuatu i eva kilim nogud jampion klab blong Vanuatu, Tafea FC, olsem wanem we samples 2000 futbol fan oli witnesem long Sarere taem wan niu Amical FC saed i winim ol red jampion ia 5-0.
Niufala saed blong Amical FC ia we i luk koj John Philemon I yusum faev impot pleya blong hem blong Solomon Islands wantaem hem I minim bisnis afta nomo wisel blong refri Mr Harry I krae blong makem fes raon.
Stret afta wisel Amical FC kapten Fenedy Masauvakalo, we i jes lusum nomo brata blong hem Ken tru long wan sik, I pasem bol i go top pleia straeka blong Solomon 37-yia-old Batram Suri hem I sendem bol ia I go long raning lef bak blong Amical. Sese I sendem bol ia I go long Billy Kidsto , raet winga blong ol red mo waet, wantok blong Solo ia i mekem wan kros mo Suri, we i bin ple blong ol klab long New Zealand, Fiji, Solomon mo Tahiti I fulumap net wetem wan hed blong hem
Taem long klok hem i jes 1minit 38 seken long 90 minit gem blong tufala jampion klab blong Nasonal Lik blong Vanuatu.
Yes Amical FC hem I minim bisnis long las Sarere from long evri dipatmen, hemia long fored, long midfil mo long bihaen, evri ples ia Amical FC i dominetem.
Tafea FC I putum tu wan strong skwad we I luk denjeres Vanuatu nasonal pleya François Sakama, mo impot blong olgeta Frazer Maebule tu pat oli pat blong fes 11 blong ol jampion blong Vanuatu ia be ol boe blong Graham Demas oli no naf blong kontenem strong plan blong Amical FC ia se bae oli kilim Tafea las Sarere.
Suri, we bae I selebretem 38 yia bedei blong hem long Novemba yia ia, mo Kidston oli rili givim had taem long ol baks blong Tafea FC we kapten Freddy Vava i lukaot kasem taem Suri I faenem bak saed blong net blong Tafea FC mo sendem Stad i bosta wetem selebresen blong ol sapota blong Amical FC.
Fes haf sko Amical FC - 2 Tafea FC – 0.
Long seken haf, klosap sem taem olsem we fes poen I go long fes haf sem samting I happen bakegen. Stret long 1 minit 40 seken, tis taem Suri nao I fidim wan bol long Kidston mo Solomon nasonal pleia ia I seftem sko blong Amical FC I go long 3-0.
Amical I putum wan moa mekem se 4-0 mo taem sam sapota oli stap singaot se Amical FC I flas nomo from ol pleia blong Solomon kapten Masauvakalo I setemap Roger Waiwai long tri meta fored long kol maot mo yangfala blong Vanuatu ia I no mestem target blong hem nating. Taem ia Suri mo Kidston oli stap watsem gem finis afsaed wetem olgeta long bens.
Faenal sko Amical FC 5- Tafea FC 0.
Win blong Amical FC ia ova long ol jampion blong Vanuatu long las Sarere hem I mekem olgeta ia we oli Antoine Rossi futbol fil I blong olgeta oli lidim anofisol PVFA TVL 2009/2010 Premia klasmen wetem 24 poen mo Tafea FC hem I gat 20 poen nomata wetem Amical I ple 10 gem finis be Tafea I ple nomo 9 gem iet.
Ol nara gem blong las Sarere I luk Teouma Academy, we ol anofisol klasmen I soem hem I stap kam namba 8 hem I givim 3-1 long Yatel FC we hem I stap kam namba 5. Academy long sisen ia hem I no semak Academy blong las sisen from ol kombinesen blong ol yangfala ia long fil I stat blong klik mo oli kam moa strong olsem risal I stat soem.
Las gem bitwin Westtan Broncos mo Spirit 08, we I stap kam namba 3 long klasmen, I luk yangfala Tony Iauko blong Westtan hem I denjeres tumas mo hem nao I openem skoring be Spirit 08 witaot sam ki pleya blong olgeta oli manej blong mekem wan kitkit nomo 1-1.
Olgeta we oli lavem Vanuatu futbol oli talem se lus blong Tafea FC long Amical FC gud long wan we from naoia bae ol jampion blong Vanuatu oli tingting strong long trening mo long disiplin from tri nekis impoten gem blong O-Lik we I stap kam antap.
Sapos Tafea FC manejmen I yusum lus ia blong stretem tim mo strateji blong ple I gat janis se Tafea FC, we naoia I stap lidim Pul B, bae I winim evri gem blong hem long hom mo go tru long nekis raon blong O - Lik kompetisen.
- Ricky Binihi