DailyPost Administrator posted on February 02, 2010 11:17
Port Vila Futbol Asosiesen o Nasonal Lik blong Vanuatu hem i mas karem sam kongratulesen long olgeta futbol fan from long klosap tu wik blong Ken Masauvakalo Memorial Cup i tek ples Port Vila Stadium i stap fas gud we.
Eksampol, long grand-faenal nomo long las Sarere i gat ova long plante handred man oli watsem futbol insaed mo afsaed long Port Vila Stadium.
Presiden blong nasonal Lik, Mr Robert Calvo, hem i konfemem long Daily Sports long naet blong faenal se PVFA i bin printim tu buk blong tikit blong ol faenal ia long Sarere mo evriwan oli flae.
Intres blong futbol hem I stap kam antap from foma nasonal pleia ia mo foma kapten blong Vanuatu tri taem let Ken Masauvakalo hem I wan man we i lavem tumas futbol mo hem I wan saening eksampol olsem wanem wan futbola hem I sud disiplinim hem wan.
Tunamen ia hem I blong givim janis blong ol wanwan klab long Nasonal Lik blong oli gat janis blong soem tru spotmansip we Masauvakalo Kap hem stap blong promotem mo Daily Sports I luk se I gat fulap klab oli raes long oksen ia blong difendem ol valiu blong feanes we I kam wetem Masauvakalo Cup.
Long ol faenal I nogat ol sending off (red kad) be I gat sam yelo kad nomo we hem i soem saen se fulap pleia standed blong disiplin blong wan wan klab I rili kap antap. Daily Sports I tokbaot ol aksen we I happen long fil we refri I luk.
Tunamen ia tu I faenem se ol gem plan blong dam klab oli jes gat koneksen, sam pleia blong klab oli no fit kasem level we Nasonal Lik I ekspektem, mo I gat saen wetem veri kompetetiv faenal se bae seken de blong sisen long wiken ia we bae I kam bae I mekem Port Vila Stadium I kontinu blong I fas.
Be wanem we Daily Sports i faenem long Sarere se I nid blong I mas gat moa help long saed blong ol refri kos blong ol top refri blong Vanuatu we oli stap tekem ol gem long Port Vila Stadium. Oli gud be I gat rum blong impruvmen speseli long saed we taem yu bloem wan wisel blong disaed wan impoten deisisen refri hem I mas stap klosap long aksen – 5 mita I gud be I no 30 mita.
Mo Daily Sports I harem long ol sapota blong sam klab olsem se Amical FC mo Spirit 08 oli mekem wan kraem (crime) blong karem ol ovasi pleia I kam ple wetem klab blong olgeta mo leftemap imej blong Nasonal Lik blong Vanuatu long OFC.
Ol sapota oli tok nogud long ol pleia blong Solomon mo Fiji olsem se hem nogud se olgeta oli kam long Vanuatu long taem blong Masauvakalo Tunamen.
Be taem oli luk kombinesen blong Batram Suri blong Solomon wetem olgeta blong Amical FC long taem blong win blong Amical ova long Mele long las gem blong tufala oli jes sek se level blong futbol ovasi I stap tu long Vanuatu.
Vanuatu hem I nid blong karem ol pleia ovasi blong seftem level blong kompetisen long Vanuatu domestik lik blong yumi save bi moa kompetetiv long O-Lik. Hemia nao pepos blong karem ol pleia I kam ovasi.
-Ricky Binihi